Poginuo Tose Proeski! :: Muzika ~ Koncerti ~ Izvodjaci

Илјадници молитви за душата на Тоше Проески

Тоше беше нашиот ангел, ни подари многу љубов, беше хуманист и го заслужи рајот, беше молитвата на околу 10.000 луѓе што дојдоа на 40-дневниот помен за трагично загинатата пејачка ѕвезда

Илјадници луѓе од Македонија и од повеќе балкански земји со солзи во очите и со голема тага, во саботата дојдоа на вечното живеалиште на Тоше Проески на Гумење, во Крушево, на 40-тиот ден од неговата смрт. Тие палеа свеќи и се молеа неговата душа да се смести во рајот. „Тоше беше нашиот ангел, ни подари многу љубов, беше хуманист и го заслужи рајот“, беа нивните коментари додека со цвеќиња во рацете чекаа да се поклонат на неговиот гроб. Крушевчаните што се грижеа за беспрекорната организација на поменот, на кој дојдоа околу 10.000 луѓе, носеа маици со ликот на Тоше на кои пишуваше „Постои само ден на раѓање“.

Најпотресни моменти беа кога на гробот пристигнаа родителите на Тоше, мајка му Доминика, татко му Никола и сестрата Дора со сопругот и со синот.

- Чедо мајкино, злато мое - болно извикуваше мајката на Тоше додека ја бакнуваше неговата фотографија поставена на гробот.

На парастосот охридско-македонскиот архиепископ г.г. Стефан во своето обраќање посочи:

- Најголеми учители на децата се родителите. Тоше беше воспитуван со голема љубов, кој покажуваше голема почит кон сите. Затоа им се заблагодаруваме на неговите родители што ни подарија толку добар, хуман и религиозен човек, кој многу веруваше и го почитуваше Господ. Но Господ ни дава Господ ни зема - рече тој.

Во тие мигови се слушна болниот крик на таткото на Тоше: „Господе зошто ни го зеде“, кој предизвика многу солзи не само кај најблиските, туку и кај сите присутни.

Во саботата изутрината во црквата „Пресвета Богородица“ се одржа заупокоената литургија, на која митрополитот Петар говореше за животниот пат и за хуманите дела на Тоше. Од политичкиот врв на 40-дневниот помен на Тоше присуствуваа министерот за транспорт и врски Миле Јанакиевски, министерот за земјоделство Ацо Спасеновски, заменик-министерот за култура Слободан Деспотовски, а од опозицијата пратеничката Весна Бендевска и поранешниот министер за култура Благоја Стефановски.

По завршувањето на поменот најблиските членови на семејството Проески, пријателите и колегите на Тоше се упатија кон хотелот „Панорама“, каде што според православните обичаи се даде ручек за душата на покојникот. Меѓу нив беше и Лилјана Петровиќ, менаџерката на Тоше, на која неколкупати и' се слоши.

Од неговите колеги и соработници на ручекот присуствуваа Весна Петрушевска, Александар Митевски, Елена Ристевска, Ламбе Алабаковски, Каролина Гочева и Огнен Неделковски, како и пејачката Антонија Шола, како и продуцентот Мирослав Поповиќ од Хрватска. Неговите колеги не можеа да ги скријат солзите истакнувајќи дека се' уште се во шок и не можат да поверуваат оти се случи таква трагедија.

Младата крушевчанка Билјана во чест на Тоше на ручекот ја запеа „Зајди, зајди“ и предизвика многу солзи кај присутните. Билјана и Тоше заедно пред две години ја пееле оваа песна на прославата на празникот Свето Преображение.

Андријана Будимир, блиската пријателка на Тоше, не се појави додека траеше поменот ниту беше присутна на ручекот. Таа на гробот дојде околу 13 часот, кога роднините и пријателите на семејството Проески веќе беа заминати.

Хрватска се' уште тагува

Четириесет дена во Хрватска се' уште се слушаат неговите песни дома и во локалите. Народот тагува по Тоше.

- Голема е загубата, но пресреќна сум што соработував со толку голема ѕвезда, со многу љубов и хуманост во себе - изјави Антонија Шола.

Поделени 5.000 сендвичи за душа

На 40-дневниот помен до 12 часот за душа на покојникот беа поделени 12 илјади пијалаци и 5.000 сендвичи. Според нашите информации, дополнително биле донесени ново количество пијалаци и сендвичи. Ѓорѓи Дервенџи, генерален директор на „Технометал Вардар“, чија сопственост е и хотелот „Панорама“ ни потврди дека во саботата попладнето пристигнале 30 автобуси од Словенија и од Хрватска.

- Хотелот работи сезонски, но викендов го отворивме специјално за сите посетители на гробот на Тоше. Подготвени сме хотелот да работи секој ден за да излеземе во пресрет на сите граѓани што ќе доаѓаат во Крушево - истакна Дервенџи.

Соња Алексоска Неделковска

Izvor: Dnevnik