Poginuo Tose Proeski! :: Muzika ~ Koncerti ~ Izvodjaci

Почна погребната церемонија на Тоше

Црковниот обред по повод трагичната смрт на македонската мега ѕвезда Тоше Проески започна утрината во Крушево. Посмртните останки на Тоше Проески се донесени во црквата Пресвета Богородица во Крушево, каде од него се простуваат најблиските.

Со црковниот обред чиноначалствува Митрополитот Пелагониско-Преспански Петар, а во црквата и околу неа се собираат многу луѓе, меѓу кои и колеги на Тоше Проески, владини претставници и претставници на јавниот и општествениот живот.

Еден час подоцна е закажана комеморација по повод смртта на Тоше Проески кај споменикот „Македониум“, а потоа ќе уследи и оддавањето последна почит.

Со погребението ќе чиноначалствува Неговото Блаженство Архиепископот Охридски Македонски Господин Господин Стефан, пренесува Макфакс

Погребувањето на посмртните останки на Тоше Проески треба да започне во 13 часот и 30 минути на градските гробишта во Крушево.

Тоше Проески вчера од Владата беше прогласен за заслужен граѓанин на Македонија.

По повод погребот на Тоше Проески, Владата го прогласи денешниот ден за Ден на жалост, а на вчерашната седница постхумно го прогласи за заслужен граѓанин на Република Македонија.

Родниот град на Тоше Проески Крушево прогласи тридневна жалост по повод смртта на својот драг сограѓанин.

Мега ѕвездата Тоше Проески (26) трагично загина во вторникот во сообраќајна несреќа во Хрватска. Посмртните останки доцна синоќа беа пренесени во Македонија, со хеликоптер на АРМ.

Македонија го испраќа Тоше

Поворката со ковчегот на Тоше пристигна на Гумење пред Македониумот со посмртни звуци на Воениот оркестар и со марш на почесниот вод на Армијата на Република Македонија. На местото се собрани илјадници жители од Крушево и цела Македонија, како и негови пријатели од странство.
Расплакани лица на граѓани, деца со венци и многубројни делегации се поклонуваат пред посмртните останки на Тоше, пренесува МИА.

Во Македониумот се одржува комеморативна седница. Покрај најблиските роднини и пријатели на Тоше, присуствуваат и владина делегација предводена од премиерот Никола Груевски, делегација на Собранието предводена од претседателот Љубиша Георгиевски, како и претставници на на МПЦ, локалната самоуправа и други.

Владата го прогласи 17 октомври, за Ден на жалост и донесе одлука, Проески постхумно да биде прогласен за заслужен граѓанин на Република Македонија.

Хеликоптерот со посмртните останки на Тоше синоќа околу 23.00 часот пристигна на аеродромот во Скопје. Со хеликоптерот пристигна и менџерката на Тоше, додека возачот е задржан на дополнително лекување.

Денес од 9 до 10 часот во црквата Света Богородица се одржа опело, кое го служеше поглаварот на Македонската православна црква, архиепископот Стефан, по што од 10.00 до 10.30 часот следуваше комеморација во Македониумот.

Телото на Тоше Проески, од 10.30 до 12.30 часот е изложено на Гумење, од каде присутните ќе можат за последен пат да се простат од Тоше. Проески во 13.00 часот ќе биде погребан на гробиштата во Крушево со највисоки државни почести.

Со црковниот обред чиноначалствува Митрополитот Пелагониско-Преспански Петар а со погребението ќе чиноначалствува Неговото Блаженство Архиепископот Охридски Македонски Господин Господин Стефан.

Веста за загинувањето на Тоше ја пренесоа бројни светски медиуми и новински агенции, меѓу кои Ројтерс, Асошиејтед Прес, Дејли Телеграф, нарекувајќи го прерано починатиот пејач "најголема поп ѕвезда на Балканот".

Сочуство до семејството Проевски изрази целиот државен врв на Република Македонија, претставниците на САД, ЕУ и УНИЦЕФ во земјава, хрватскиот премиер Иво Санадер, комплетната македонска естрада, како и неговите соработници од странство.

Во возилото, освен Тоше, кој најверојатно спиел на предното седиште, била и неговата менаџерка Лилјана Петровиќ (1958). Возач на џипот бил Ѓорѓе Ѓорѓевски (1975) кој заедно со Љиља се пренесени во болница. Ѓорѓевски се здобил со тешки повреди на главата, додека Петровиќ е полесно повредена.

Полицијата потврди дека до несреќата дошло заради непридржување кон безбедната оддалеченост од возилото пред нив. Џипот удрил во левиот дел од приколката на камионот со италијански регистрации, по што се забил во средишната заштитна ограда на автопатот.

Возачот на камионот изјавува дека ударот бил толку силен, што и тој би се превртил доколку не бил натоварен со 25 тона градежен материјал. Можно е возачот на Туарегот да заспал на воланот.

Според најновите информации, обдукцијата извршена на патологијата во Нова Градишка, покажала дека причина за брзата смрт на Тоше било пукањето на третиот (вратен) пршлен.

Тоше патувал за Загреб, каде во студиото на Никша Братош требало да сними англиска верзија на еден свој хит. Дел од обврските биле и снимањето на спотот за песната "Вежи ме за себе" и гостувањето во познатата хрватска ТВ емисија "Зухра шоу".

Izvor: On Net