Hapsenje i sudjenje haskom optuzeniku Radovanu Karadzicu

Радован Караџиќ уапсен во Србија

22.07.2008 09:34

Радован Караџиќ, по кого Хашкиот трибунал има распишано потерница, беше уапсен синоќа од страна на српските служби за безбедност. Тоа го соопштија од Кабинетот на претседателот Борис Тадиќ.

„Караџиќ беше локализиран и уапсен“, се наведува во соопштението. Во текстот не се наведуваат други детали, но според извор близок до обвинителството, поранешниот лидер на босанските Срби за време на војната во Босна во 1992-1995 година бил уапсен на српска територија.

Шеесет и тригодишниот Караџиќ не давал отпор при апсењето и бил во депресивна состојба во моментот на апсење, открива извор близок до српските служби за безбедност.

По апсењето Караџиќ бил одведен пред истражниот судија на српскиот Совет за воени злосторства Милан Дилпариќ.

Министерството за внатрешни работи соопшти дека негови претставници не учествувале во апсењето на Караџиќ.

Хашкиот трибунал го обвинува Караџиќ за раководење на масакрот на околу 8.000 муслимански мажи во Сребреница.

Караџиќ се криеше од Трибуналот околу 13 години со помош на мрежа од помошници. НАТО досега имаше неколку неуспешни обиди за негово апсење.

Српските власти дејствувале врз основа на информација, дадена од странско разузнавање, додаде изворот. Шеесет и тригодишниот Караџиќ не давал отпор при апсењето и бил во депресивна состојба во моментот на апсење, открива изворот.

Во меѓувреме, адвокатот на Радован Караџиќ, Светозар Вујачиќ, изјави рано утринава пред новинари, дека неговиот клиент бил уапсен во Белград во петокот, на 18 јули. Вујачиќ тврди дека Караџиќ бил уапсен во 21.30 часот по локално време во автобус, кој се движел од квартот Батајница.

Поранешниот политички лидер на босанските Срби се движел од Батајница кон новиот дел на Белград, појасни неговиот адвокат. Тој посочи дека при апсењето биле покриени очите на неговиот клиент за да не види кој го уапсил, како и оти по апсењето бил одведен во „некаква соба со непозната местоположба“.

Според адвокатот, незаконски е тоа што неговиот клиент е доведен пред истражен судија во понеделникот вечерта. Радован Караџиќ ќе се брани со молчење, бидејќи „целиот процес е фарса“, истакна Вујачиќ.

Адвокатот е убеден дека неговиот клиент ќе остане во српскиот специјален суд за воени злосторства, додека не биде предаден на Меѓународниот трибунал за воени злосторства за поранешна Југославија.

Сопругата на Караџиќ, Лилјана, била информирана за апсењето на својот сопруг од нивната ќерка Соња некаде пред полноќ. - Кога телефонот заѕвони, знаев дека нешто не е во ред. Шокирана сум. Збунета. Сега барем знам дека е жив, изјави Лилјана Караџиќ.

Главниот обвинител на Хашкиот трибунал Серж Брамерц, кој беше предвидено да пристигне денеска во посета на Србија, ја одложи посетата по апсењето на Караџиќ, соопшти портпаролката на Брамерц, Олга Кавран.

Таа не даде други детали за претстојното префрлување на поранешниот политички лидер на босанските Срби во Хаг.

Српското МВР синоќа соопшти дека негови претставници не учествувале во пронаоѓањето и апсењето на Караџиќ.

Претседателот на српскиот Парламент Славица Џукиќ-Дејановиќ изјави синоќа по повод апсењето на Караџиќ дека „треба да се почитува меѓународното право и националните закони“. Според неа, сега претстои проверка на идентитетот на приведениот и останатите процедури во такви случаи.

Караџиќ во продолжение на повеќе од една деценија беше број еден во списокот на најбараните лица од Хашкиот трибунал.

Трибуналот уште во 1995 година - по крајот на војната во Босна, објави 15 обвиненија против него за воени злосторства, злосторства против човештвото, геноцид и други злосторства.

Претстои процедура за предавање на Караџиќ на Трибуналот во Хаг, која може да трае неколку месеци.

По апсењето на Караџиќ на слобода остануваат уште двајца хашки бегалци - поранешниот воен командир на босанските Срби Ратко Младиќ и лидерот на Република Српска Краина во Хрватска Горан Хаџиќ.

Европската унија го постави предавањето на сите обвинети како услов за прием на Србија за нејзина полноправна членка. Унијата го поздрави апсењето на Караџиќ како огромен чекор напред во тој процес.

Izvor: A1