Насилство и повредени на протестот во Скопје



Насилство со повредени го одбележа денешниот протест во Скопје против изградбата на црквата на плоштадот Македонија, на кој се појавила и поголема група контрадемонстранти.

Очевидци на случувањата за Макфакс тврдат дека неколку лица биле повредени во инцидентот, додека од полицијата информираат оти до 13 часот немало пријави за повредени.

Според очевидците станува збор за млади лица со повреди во пределот на главата.

Учесниците во протестот против изградбата на црквата, што го организираа Прогресивен млад синдикат и Прва Архи Бригада, на плоштадот се соочиле поголема група луѓе со спротивни ставови по што дошло до кошкање, кое прераснало во физичка пресметка со тупаници и шлаканици.
 
 

Демонстрантите тврдат дека биле нападнати од групата контрадемонстранти.

Полицијата соопшти дека дошло до нарушување на јавниот ред и мир помеѓу двете групи, едната помала, која била против изградбата на црквата и друга поголема со спротивен став.

МВР најави соодветни пријави против учесниците, како и побарување одговорност од организаторите на протестот, кој бил должен да обезбеди редарска служба и да го прекине протестот ако е загрозена безбедноста.

Македонската јавност извесен период е сведок на дебата про и контра изградба на црква на плоштадот во Скопје, меѓу ВМРО-ДПМНЕ и СДСМ.



A1

преведи